الآنــســـــه مخنــــــــوقـــــــــة

الأحد، 12 أكتوبر، 2008

أنا و القطار...


أنا و القطار......

القطار هو ذلك الشيء الي ماشي في طريقه و بيقف عند كل محطة يركب ناس وبينزل ناس تانيين ... في النهاية كل الاناس بتنزل منه.. عمر ما حد طول فيه أو فضل فيه للأبد .. أصلا مفيش حد عاوز يطول فيه .. أي شخص لو ركبه بيركبه عشان يوصل لمكان معين و بمجرد ما يوصل ينزل و يسيبه .. ...... أنا بقى حياتي بالظبط زي القطار ده .. خلال المدة الي عشتها قابلت ناس كتيييييييييير و فارقت نااس أكتر .. لكن عمري ما كان عندي صديق دائم أو شخص قريب مني .. أصلا عمري ما وثقت في حد و آمنته على أسراري ده إن كان عندي اسرار أصلاً- لأني متأكدة أن أي شخص أعرفه دلوقتي في يوم من الأيام هيبقى مجرد ذكريات .. كل صداقاتي كانت مصلحة .. مجرد ايام و بقضيها .. مش لأني نذلة أو مليش صاحب .. لألأ قطعاً لأأأأأأأأأ .. أنا عمري ما كنت نذلة .. أنا بس بحاول أني متعلقش بحد لأني واثقة ان أي صداقة بالنسبة ليا مصيرها في النهاية الفراق .. و أنا لما أتعلق بحد مبقدرش أسيبه .. و لعلك يا عزيزي القارئ تتساءل ليه أنا مقدرش أكون صداقات دائمة ؟؟؟ هقلك ليه .. لأني انا واحدة عمري ما جربت الاستقرار أو حتى شميت ريحته .. حياتي كلها ضايعة في السفر من مكان لمكان .. من أرض لأرض و غصب عني بسيب أعز و أغلى الناس عليا .. و البعد قد يطول لأيام و أسابيع و شهور و أحياناً سنين .. لكن مهما طال عمري ما بقدر أنسى أي شخص تعلقت بيه .. و تخيل عزيزي القارئ لو أنك مكاني .. تخيل أنك طول اليل و النهار بتفكر في الناس الي بتحبهم و نفسك ترجعلهم و هتموووووووووووت عشان تشوفهم و للأسف بينك و بينهم ملايين الكيلومترات .. و حتى لو كلمتهم كل يوم و شفتهم على النت ولا الموبايل برضو عمرده ما هيكون زي لما تكون جنبهم و معاهم .. أنا واحدة أكبر مشاكلي أني بسافر و بعيدة عن أهلي رغم ان ده حلم كتيييييييييييير من شباب مصر ... عشان كدا أنا بقول لأي واحد قريب من أهله و حبايبه و عايش وسطهم : أنااااااااا بحســــــــــــــــــــــــــــــــــــــــدك على النعمة الي أنت فيها...... و كمان بنصح أي شاب طموح بيحلم انو يسافر و يتغرب انو يعقل و يفكر ملييووووووووون مرة و يحمد ربنا عالنعمة ألي هو فيها و عموماً رزقه الي مكتوب ليه هيوصله اينما كان ....

الجمعة، 10 أكتوبر، 2008

احنا هنفوق امتى؟؟؟؟؟؟؟؟؟؟؟؟؟

دي اول مرة ليا اكتب في مدونة و بصراحة انا مفكرتش في موضوع المدونة ده الا لأني بجد اتخنقت .. مش هقول اني اتخنقت من الحياة و العيشة و الظروف و الكلام الفارغ ده كله .. لأ بالعكس .. انا الحمد لله عندي اطيب ام و اب في العالم و احسن اخوات و افضل عائلة و ظروفنا و لله الحمد تمام و مش محتاجة اي حاجة و حتى لو كنت نفسي في حاجة بس مش عندي مش مشكلة كل واحد بياخد نصيبه ... انا لما اقول اني اتخنقت فأنا قصدي اني اتخنقت من البشر و من الحالة الي وصلولها .. اتخنقت لاني انا واحدة خام و الناس دي كلها ذئاب و دايما بتخدع فيهم و بصدق الاقنعة الي هما لبسينها و الي تحسبه موسى يطلع فرعون ... اتخنقت لاني بجد مبقتش عارفة اصدق مين و أثق في مين ؟؟ ده حتى اعز اصدقائك ممكن في لحظة يبيعك و يغدر بيك ... البشر نسيو ان كلهم بني آدم زي بعض من لحم و دم و نسيو انهم مخلوقين من طين و أنو اصلا الدنيا الي هما عايشين فيها مش بتاعتهم ولا حتى فلوسهم و املاكهم بتاعتهم .. دي كلها املاك الملك القدوس ... نسيو نفسهم عالآخر و كل واحد اخد رشاش و نزل قتل في اخواته الأنسان الي زيه من غير ما يفكر حتى .. الشيطان اعماهم و غمى عيونهم و قدر يضحك على عقولهم .. انا مش عارفة احنا رايحين فين ؟؟؟ عمالين نرجع لورا من غير تفكير .. و أول ما تيجي تكلم واحد يقلك احنا احفاد الفراعنة .. احنا الي كنا و كنا .. احنا الي كنا في يوم من الايام اسياد الارض دي .. طيب ده كاااااااااااااااااااااان .. كـــــــــــاااااااااااان زماااااان و الي فات مات ... لحد امتى هنفضل نبص لورا عشان منشفش الي قدام ؟؟ احنا مالنا و مال ايام زمان ؟؟ احنا ولاد النهاردة .. فووووووقوووووووووو بقى ....أصحووووو

بداية.:.

أولاً و قبل اي كلام : السلام عليكم و رحمة الله و بركاته...
ثانيا : دي أول مدونة ليا .. أنا أنشأتها عشان أعبر عن رأيي و أشاركه معاكم فياريت لو اي حد عنده تعليق على كلامي يحطهو نتناقش فيه
ثالثاً:أعرفكم بنفسي : مجرد بنت مصرية عمري 16 سنة عايشة بالخارج و مهتمة جدا جدا جداااااا بالمجتمع المصري و الي بيحصل فيه و نفسي لو أقدر أعمل حاجة أساعد و أطور بيها
رابعاً:أنا ممكن اقول كلام يضايق بعض الناس فياريت مهما قلت محدش يزعل مني لان ده مجرد رأيي و مهما كان أختلاف الرأي لا يفسد للود قضية
خامساً:تحياتي للجميع و سلاااااااام